Demostrazzjoni faxxista

Illum suppost issir fil-Belt l-hekk imsejħa ‘Demostrazzjoni Favur il-Gvern Malti Fil-Ġlieda Tiegħu Kontra l-Immigrazzjoni Illegali’. Il-gvern Malti, partikularment il-Prim Ministru Joseph Muscat, ma japprovax din id-demostrazzjoni u talab lill-membri kollha tal-gvern—kif ukoll, nassumi, lill-Laburisti kollha—biex ma jieħdux sehem fiha. U bir-raġun. Hija demostrazzjoni ta’ għajb! Għax hija demostrazzjoni faxxista.

Messaġġ imħawwad

Il-gvern Laburista qajjem dak li ma riedx: sentimenti faxxisti u razzisti kontra nies vulnerabbli u msejkna. Filwaqt li, minn naħa, qiegħed jaħdem iebes f’kull qasam għall-ġustizzja soċjali, b’effett sfortunat ta’ azzjoni mgħaġġla li ħa fl-4 ta’ Lulju li għadda ta l-impressjoni (żbaljata?) li pajjiżna m’għadx għandu politika ta’ ħniena u mgħodrija mal-imsejkna refuġjati li jaslu fuq xtutna.

Il-messaġġ imħawwad li spiċċa biex xandar dak in-nhar (forsi mingħajr ma ried) qiegħed jidher ċar f’din id-demostrazzjoni opportunista u barra minn lokah, li lanqas fi żmien il-gvern Nazzjonalista ma qatt saret bħalha. Qed tappoġġja politika governattiva li l-gvern m’għandux! Qed tappoġġja politika faxxista li l-gvern la għandu u lanqas jista’ jkollu.

Mela x’inhi din id-demostrazzjoni? Hi demostrazzjoni ta’ nies li ma jridux jifhmu l-kumplessità tas-sitwazzjoni, li jaħsbu b’mod simpliċistiku għall-aħħar u li jimmaġinaw lil dil-biċċa gżira hi xi art maqtugħa mid-dinja ta’ madwarha. Eżatt bħalma jagħmel kull faxxist, wara kollox.

Iebsa ma’ Brussell

Id-demostrazzjoni mhijiex favur li nkunu iebsa mal-politiċi ta’ Brussell. Li kieku kien hekk, kien ikun hemm xi grazzja fiha. Iżda l-fatti juru ħaġa oħra. Tassew li l-gvern hekk qal li jrid ikun—iebes mal-politiċi ta’ Brussell—u f’dan jista’ għandu mitt elf raġun. Iżda mill-aħħar żewġ deċiżjonijiet li ħa l-Ministru tal-Affarijiet Barranin f’Brussell dwar il-kwestjoni tas-Sirja, ftit jidher li dan id-diskors jista’ jittieħed bis-serjetà.

Għala? Għax, filwaqt li fil-prinċipju kien kontra Brussell biex ma jibgħatx armi lis-Sirja u biex ma jqegħidx lill-Hesbollah fil-lista tat-terroristi, fil-fatt aċċetta (anki jekk taparsi parzjalment) dak li riedet Brussell. F’dawn iż-żewġ każijiet il-gvern ma kien iebes xejn mal-politiċi ta’ Brussell. Anzi, bażikament qagħad għal dak li riedu huma.

L-arja mar-refuġjati jaf jagħmilha kulħadd. Dawn m’għandhom ebda mezz biex jiddefendu lilhom infushom. La jistgħu jkunu iebsa ma’ Brussell, la mal-gvern tagħhom u lanqas ma gvern ta’ pajjiż daqs nitfa bħal tagħna. Dawn ma jistgħux jagħmlu demostrazzjonijiet il-Belt jew ixewxu n-nies fuq Facebook. Kulma jagħmlu hu li jsofru.

L-istat reali tal-kwestjoni

L-obbligazzjonijiet tagħna—bħala pajjiż u bħala individwi—quddiem it-traġedja tar-refuġjati mhijiex sempliċiment kwestjoni ta’ ħniena. Lanqas ma hi biss kwestjoni ta’ liġi internazzjoni. Hija kwestjoni wkoll ta’ realtajiet umani konkreti. Milli nara jien, il-biċċa l-kbira tan-nies mhumiex informati biżżejjed fuq l-istat real tat-traġedja u ta’ kid qiegħda realment taffettwa lil pajjiżna.

Jiena nħoss li dawk kollha li huma responsabbli tal-midja lokali—il-gvern l-ewwel wieħed; imma mhux hu biss—għandu l-obbligu li jgħarraf lill-pubbliku bil-qagħda ta’ din is-sitwazzjoni fuq il-medda tas-snin li għaddew. Nisimgħu l-ħin kollu lill-midja tgħid kemm waslu refuġjati fuq ix-xtut tagħna. Iżda mbagħad, dwar dawn l-imsejkna nies ma jgħidu xejn aktar.

L-impressjoni ta’ ħafna nies hija li dawk kollha li jaslu fuq xtutna bħala refuġjati jibqgħu jgħixu Malta, li jingħataw benefiċċi kbar u li huma piż bla qies fuq l-ekonomija tagħna. Dawn huma impressjonijiet ħżiena li l-gvern u kulmin għandu aċċess għall-midja jrid jikkoreġi. Nifhem, għalhekk, li f’dan ir-rigward irid isir sforz akbar biex il-fatti jintwerew għal dak li huma. Il-paniku li xi wħud qegħdin iċedu għalih hu bbażat fuq finzjonijiet li l-gvern jista’ jikkoreġi faċilment.

Il-ġustizzja vantaġġ għalina

Jiena nħoss li din il-korrezzjoni, jew wiri aħjar u aktar ċar ta’ x’inhi eżatt u realment is-sitwazzjoni tar-refuġjati wara li jaslu f’pajjiżna, hija essenzjali sabiex in-nies ikollhom idea aħjar u aktar korretta ta’ din ir-realtà. Naħseb li, fost ħafna nies, qiegħed jinħoloq paniku għalxejn u mingħajr fundament reali. Dan għaliex mhumiex informati biżżejjed u b’mod xieraq ta’ x’inhi realment is-sitwazzjoni.

Il-gvern tabilħaqq għandu obbligu jkun ħarex u iebes mal-politiċi ta’ Brussell—u mhux f’din il-kwestjoni biss—biex ma joqogħdux jinqdew bina (bħalma jagħmlu b’ħaddieħor) filwaqt li huma jixxaħxu fil-kappriċċi tagħhom. Għandu jurihom li aħna m’aħna l-paljazzi ta’ ħadd, wisq anqas it-tapiti tagħhom. Iżda ħadd mill-imsejkna refuġjati—jew xi persuna sfortunata oħra li ma tistax tiddefendi lilha nnifisha—m’għandu jħallas xi prezz għal din il-ħruxija jew l-ebusija.

Il-gvern Laburista, li sa mill-bidu tiegħu ggwida ruħu mill-ħniena għaż-żgħir u l-ġustizzja għall-fqir, għandu jkun kburi, bħalma diġà hu, li jinsab fuq in-naħa ta’ min ma jistax jiddefendi lilu nnifsu u li jitqies bħallikieku kien iż-żejjed jew l-irmixt tas-soċjetà. Il-politika tiegħu, għalhekk, għandha tirrifletti dan. U dan għandu jiġi muri biċ-ċar li hu fil-fatt ta’ ġid għal pajjiżna u għall-ġejjieni tagħna.